ఒక యువకుడిపై ఒక మహిళ ఫేక్ రేప్ కేసు పెట్టింది. ఫేక్ రేప్ కేసు కారణంగా ఆ యువకుడు నాలుగేళ్లు జైల్లో గడపాల్సి వచ్చింది. చివరకు అసలు నిజం బయటపడడం వల్ల 54 నెలల తర్వాత నిర్దోషిగా బయటపడ్డాడు. అయితే ఫేక్ రేప్ కేసు పెట్టిన మహిళకు కోర్టు జైలు శిక్ష విధిస్తూ కోర్టు సంచలన తీర్పు విధించింది. ఉత్తరప్రదేశ్ రాష్ట్రంలోని బరేలీకి చెందిన ఓ మహిళ డిసెంబర్ 2,2019న తన కూతురిపై అత్యాచారం చేశారంటూ పోలీసులకు ఫిర్యాదు చేసింది. అజయ్ అలియాస్ రాఘవ్ అనే యువకుడు తన 15 ఏళ్ల కూతురిని నమ్మించి ఢిల్లీకి తీసుకెళ్లాడని, మత్తు పదార్థాలు ఇచ్చి అత్యాచారం చేశాడని ఆ మహిళ తన ఫిర్యాదులో తెలిపింది. కేసు నమోదు చేసిన పోలీసులు అజయ్ ని కోర్టులో హాజరుపరిచారు. అజయ్ తనపై అత్యాచారం చేశాడంటూ బాలిక కూడా మొదట వాంగ్మూలం ఇచ్చింది. దీంతో ఈ కేసు అప్పటి నుంచి పెండింగ్లో ఉండగా నిందితుడు నాలుగేళ్లుగా జైలులో ఉన్నాడు.
ఆ తర్వాత కోర్టులో విచారణలో తన వాంగ్మూలం తప్పని న్యాయమూర్తి ఎదుట ఆ బాలిక చెప్పింది. అజయ్ తనకు ఎలాంటి హాని చేయలేదని, అతడు తనని ఢిల్లీకి కూడా తీసుకెళ్లలేదని తెలిపింది. దీంతో అజయ్ను నిర్దోషిగా ప్రకటించింది అడిషినల్ సెషన్స్ కోర్టు. తప్పుడు కేసు పెట్టినందుకు ఆ బాలిక తల్లిపై కేసు నమోదు చేయాలని ఆదేశించింది. దీంతో పాటు ఆ అమాయకపు యువకుడు శిక్ష అనుభవించినన్ని రోజులు మహిళను కూడా జైలులో ఉంచాలని జడ్జి ఆదేశించారు. దీంతో పాటు రూ.5,88,822 జరిమానా విధించారు. ఈ జరిమానా చెల్లించని పక్షంలో మరో ఆరు నెలల పాటు అదనంగా జైలు శిక్ష అనుభవించాలని తీర్పు ఇచ్చారు. కోర్టు తీర్పుతో మహిళకు కళ్లు బైర్లుగమ్మాయి.