రెండు రాష్ట్రాలకు హైదరాబాద్ ఉమ్మడి రాజధానిగా పదేళ్లపాటు పని చేసింది. ఆ పదేళ్లు నిన్నటితో ముగిశాయి. ఇక నుంచి తెలంగాణ రాజధానిగా హైదరాబాద్ మనదే కానుంది. దీంతో ఎలాంటి విభజన సమస్యలు లేని హైదరాబాద్ లోని భవనాలన్నీ కూడా రాష్ట్ర ప్రభుత్వం స్వాధీనం చేసుకోనుంది. పదేళ్లు ఉమ్మడి రాజధాని ప్రకటించినా ఏపీ ప్రభుత్వం మాత్రం 2016-17లోనే అక్కడికి షిఫ్ట్ అయింది. అయినప్పటికీ హైదరాబాద్ జూన్ 1, 2024 వరకు ఉమ్మడి రాజధానిగా కొనసాగింది.
హైదరాబాద్‌లో ఏపీ ప్రభుత్వానికి చెందిన ఆయా శాఖల పరిధిలో ఉన్న భవనాలన్నీ తెలంగాణకు చెందనున్నాయి. కాగా, హైదరాబాద్ లోని కొన్ని భవనాలను ఇంకొంతకాలం కంటిన్యూ చేయాలని ఏపీ ప్రభుత్వం కోరినట్లు తెలిసింది. అయితే దీనిపై తెలంగాణ ఎలాంటి నిర్ణయం తీసుకోలేదని తెలుస్తోంది. విభజన చట్టంలో చాలా అంశాలు పెండింగ్ లో ఉన్నందున పునర్విజన చట్టాన్ని సవరించి, ఇంకొంత కాలం టైమ్ ఇవ్వాలని ఏపీ కోరినట్లు సమాచారం.
చరిత్ర చూసుకున్నట్లైతే ఒక్కప్పుడు తెలంగాణ హైదరాబాద్ రాష్ట్రంగా ఉండేది. హైదరాబాద్ రాష్ట్రం 1948 సెప్టెంబర్ 17 భారత్ లో విలీనం అయింది. ఆ తర్వాత హైదరాబాద్ రాష్ట్రంగా ఉంది. 1956లో మద్రాస్ నుంచి విడిపోయిన ఏపీని తెలంగాణకు కలిపి ఆంధ్రప్రదేశ్ ఏర్పాటు చేశారు. ఈ కలయికను అప్పటి నుంచి తెలంగాణ ప్రజలు వ్యతిరేకిస్తూ వస్తున్నారు. చివరకు తిరిగి స్వరాష్ట్రం సాధించుకున్నారు.