గ్రామంలోకి కోతులు వ‌చ్చి ఇబ్బందులు ప‌డుతున్నాయ‌ని, ఒక గ్రామంలో కోతుల బెడదను నివారించేందుకు ఏకంగా వాటిని కాల్చి చంపారు. సుమారు 17 కోతులు కాల్పుల్లో మరణించాయి. మరికొన్ని తీవ్రంగా గాయపడ్డాయి. ఈ విషయం తెలిసిన అటవీ శాఖ అధికారులు దర్యాప్తు చేపట్టారు. ఛత్తీస్‌గఢ్‌లోని బెమెతర జిల్లాలో ఈ సంఘటన జరిగింది. బెల్గావ్ గ్రామంలో కోతులు ఇళ్లలోకి ప్రవేశించి ప్రజలకు ఇబ్బంది కలిగిస్తున్నాయి. అలాగే పంటలను నాశనం చేస్తున్నాయి. దీంతో ఆ గ్రామంలో ఇటీవల ఒక సమావేశాన్ని నిర్వహించారు. కోతులను తరిమేందుకు ఇద్దరు కూలీలను నియమించారు.
గతంలో కర్రలతో కోతులను బెదరకొట్టి గ్రామం నుంచి తరిమేవారు. అయితే ఈసారి కోతులను తరిమేందుకు నియమించిన వ్యక్తులు తుపాకులు వినియోగించినట్లు గ్రామస్తులు తెలిపారు. ఆగస్ట్ 28న కోతులపై కాల్పులు జరిపి వాటిని చంపినట్లు ఆరోపించారు. సుమారు 17 కోతులు ఈ కాల్పుల్లో మరణించగా మరికొన్ని గాయపడ్డాయని తెలిపారు. దీనిపై కొందరు గ్రామస్తులు ఆగ్రహం వ్యక్తం చేశారు. అటవీ శాఖ అధికారులకు ఫిర్యాదు చేశారు. మరోవైపు మరణించిన కోతుల కుళ్లిన కళేబరాలను అటవీ శాఖ సిబ్బంది స్వాధీనం చేసుకున్నారు. కొందరు అనుమానితులను ప్రశ్నించారు. అయితే కాల్పులు జరిపి కోతులను చంపారన్న వాదనలను అటవీ శాఖ అధికారి ఖండించారు. కోతుల మరణానికి ఖచ్చితమైన కారణం ఇంకా తెలియలేదని అన్నారు. దీనిపై దర్యాప్తు చేస్తున్నట్లు వెల్లడించారు.