ఆన్‌లైన్‌ రుణాలపై కేంద్ర ప్రభుత్వం మరోసారి హెచ్చరించింది. ‘క్యాష్ఎక్స్‌పాండ్‌-యూ’ పేరిట ఆన్‌లైన్‌లో రుణాలు అందించే యాప్‌ నకిలీదేనని పేర్కొంది. అంతేకాకుండా ఈ యాప్‌ను గూగుల్‌ ప్లే స్టోర్‌ నుంచి తొలగించామని, యూజర్లు కూడా ఫోన్లలో వెంటనే తొలగించాలని సూచించింది.
”CashExpand-U Finance Assistant-లోన్‌ యాప్‌పై జాగ్రత్త. ఇది నకిలీది. దీని మూలాలు శత్రు దేశంలో ఉన్నట్లు తెలిసింది” అని పేర్కొంటూ ప్రభుత్వ సైబర్‌ క్రైమ్‌ విభాగం సైబర్‌ దోస్త్‌ వెల్లడించింది. ఈ యాప్‌ను తక్షణమే ఫోన్ల నుంచి తీసివేయాలని, తద్వారా కీలక సమాచారం దుర్వినియోగం కాకుండా చూసుకోవచ్చని తెలిపింది.
స్వల్ప రుణాలు ఇస్తామంటూ ఆన్‌లైన్‌లో అనేక యాప్‌లు చూస్తుంటాం. ఇటువంటి యాప్‌లు విశ్వసించేవి కావని, వాటితో యూజర్ల ఆర్థిక సంబంధ సమాచారం దుర్వినియోగమయ్యే అవకాశాలుంటాయని ప్రభుత్వం హెచ్చరిస్తూనే ఉంది. ఇందుకు సంబంధించి గతేడాది 1062 ఫిర్యాదులు వచ్చినట్లు ప్రభుత్వం ఇటీవల వెల్లడించింది. అటు గూగుల్‌ కూడా 2023 సెప్టెంబర్‌ నెలలో ఒకే వారంలో 134 ఫేక్‌ యాప్‌లను ప్లేస్టోర్‌ నుంచి తొలగించినట్లు అప్పట్లో ప్రకటించింది.