పాఠశాలకు సంబంధించిన వాట్సప్ గ్రూప్ చూడట్లేదని ఉపాధ్యాయుడిని సస్పెండ్ చేశారు. విజయవాడలోని మొగల్రాజపురం బీఎస్ఆర్కే ఉన్నత పాఠశాల ఉపాధ్యాయుడు ఎ.రమేష్ స్కూల్ వాట్సప్ గ్రూప్లోని మెసేజ్లు చూడడం లేదు. మెసేజ్లు చూడడం లేదని ఉపాధ్యాయుడిని సస్పెండ్ చేయడం వివాదాస్పదంగా మారింది. దీనిపై ఉపాధ్యాయ సంఘాలు ఆగ్రహం వ్యక్తం చేస్తున్నాయి. వెంటనే సస్పెన్షన్ను రద్దు చేయాలంటూ.. జిల్లా విద్యాశాఖ అధికారులకు యూటీఎఫ్ ఆధ్వర్యంలో శనివారం వినతిపత్రం అందజేశారు.
తనకు కంటి సంబంధిత సమస్య ఉండడంతో స్మార్ట్ఫోన్ వాడొద్దని వైద్యులు సూచించారని రమేష్ వివరణ ఇచ్చినా.. వ్యక్తిగత విషయాన్ని సాకుగా చూపిస్తూ సస్పెండ్ చేయడం ఏంటని వారు ప్రశ్నిస్తున్నారు. దీనిపై జిల్లా విద్యాశాఖాధికారి యు.వి.సుబ్బారావు మాట్లాడుతూ.. వాట్సప్ గ్రూపు నుంచి రమేష్ అకస్మాత్తుగా వెళ్లిపోవడం, విధినిర్వహణలో నిర్లక్ష్యంగా ఉండడం, కంటి సమస్య ఉన్నట్లు వైద్యులు సూచించిన ధ్రువీకరణపత్రాలు సమర్పించాలని కోరినా స్పందించకపోవడం వల్లే ఆయనపై క్రమశిక్షణ చర్యలు తీసుకున్నట్లు తెలిపారు.