హిందూ వివాహ చట్టం ప్రకారం వివాహం చేసుకోవడానికి ‘కన్యాదానం’ అవసరం లేదని అలహాబాద్ హైకోర్టు లక్నో బెంచ్ వ్యాఖ్యానించింది. అశుతోష్ యాదవ్ దాఖలు చేసిన రివిజన్ పిటిషన్‌ను విచారించిన హైకోర్టు.. చట్టం ప్రకారం, కేవలం ‘సప్తపది’ (ఏడడుగులు) మాత్రమే హిందూ వివాహానికి అవసరమైన వేడుక అని పేర్కొంది. జస్టిస్ సుభాష్ విద్యార్థి సింగిల్ బెంచ్ ఈ వ్యాఖ్య చేసింది. అశుతోష్ యాదవ్ తన అత్తమామలు దాఖలు చేసిన వివాహ వివాదానికి సంబంధించిన క్రిమినల్ కేసుపై పోరాడుతూ మార్చి 6న లక్నోలోని అదనపు సెషన్స్ కోర్టులో పిటిషన్ దాఖలు చేశారు. ఈ కేసులో ఇద్దరు సాక్షులకు మళ్లీ సమన్లు జారీచేయాలని ఆయన తన పిటిషన్ ద్వారా కోర్టును అభ్యర్థించారు. ఆయన పిటిషన్‌ను కోర్టు తిరస్కరించింది. దీనిపై ఆయన హైకోర్టును ఆశ్రయించారు.
పిటిషనర్ అతని భార్యతో వివాహం జరిగిందో లేదో నిర్ధారించడానికి వాదితో సహా ప్రాసిక్యూషన్ సాక్షులను తిరిగి పిలిపించడం అవసరమని హైకోర్టులో వాదించారు. దీనిపై హైకోర్టు హిందూ వివాహ చట్టంలోని సెక్షన్ 7ను ప్రస్తావించింది. దీని ప్రకారం సప్తపది అంటే ‘ఏడడుగులు’ హిందూ వివాహానికి తప్పనిసరి సంప్రదాయంగా పరిగణించబడుతుందని పేర్కొంది. జస్టిస్ సుభాష్ విద్యార్థి మాట్లాడుతూ, ‘హిందూ వివాహ చట్టంలోని సెక్షన్ 7లో పేర్కొన్న నిబంధనలను దృష్టిలో ఉంచుకుని, కన్యాదానం జరిగిందా లేదా అనే ప్రశ్నకు సంబంధం లేదు. ఎందుకంటే చట్టం ప్రకారం, హిందూ వివాహానికి కన్యాదానం తప్పనిసరి సంప్రదాయం కాదు. చట్టంలో, సప్తపది అంటే ఏడడుగులు అనేది హిందూ వివాహాన్ని జరుపుకోవడానికి అవసరమైన ఆచారంగా పరిగణించబడుతుంది. కాబట్టి సాక్షులను మళ్లీ పిలిపించుకోవాల్సిన అవసరం లేదు. అందువల్ల రివిజన్ పిటిషన్‌ను ధర్మాసనం కొట్టివేసింది.