ఓ విద్యార్థి తండ్రిని పాఠశాల కమిటీ ఎన్నికల్లో చొక్కా విప్పి అవమానించడంపై మంత్రి సంధ్యారాణి తీవ్ర ఆగ్రహం వ్యక్తం చేశారు. మన్యం జిల్లా మక్కువ మండలంలోని మోడల్ స్కూల్లో ఇటీవల జరిగిన పాఠశాల కమిటీ ఎన్నికల సమయంలో ఓ విద్యార్థి తండ్రిపై టీచర్లు ప్రవర్తించిన తీరును ఆమె తప్పుబట్టారు. సోమవారం కలెక్టరేట్లో నిర్వహించిన ప్రజాసమస్యల పరిష్కార వేదికలో మంత్రి ప్రజల వినతులను స్వీకరించారు. ఈ సందర్భంగా తనకు జరిగిన అవమానంపై ఆ విద్యార్థి తండ్రి మంత్రికి వినతిపత్రం అందజేశారు.
దీనిపై స్పందించిన మంత్రి సంధ్యారాణి అధికారుల తీరును తీవ్రంగా తప్పుబట్టారు. పసుపు చొక్కా వేసుకున్నారన్న సాకుతో గిరిజనుడిని రెండు గంటల పాటు నగ్నంగా నిలబెట్టడం ఎంతవరకు సమంజసమని నిలదీశారు. ఈ ఘటనకు బాధ్యులపై విద్యాశాఖ తక్షణమే కఠిన చర్యలు చేపట్టేలా చూడాలని డీఈవోను ఆదేశించారు. ఈ ఘటనకు సహకరించిన హోంగార్డు, హెచ్ఎంపై కఠిన చర్యలు తీసుకోవాలన్నారు.
